Ludzie padajom "teściowo nie rodzina, krupniok nie wyndlina". Totyż taki łobiod możesz zjeść i piontek, a grzychu nie bydzie ;-)
No, te trocha wyndzonki, to chyba ksiondz pleban łodpuszczom.
To jest porcyjo na chłopa, co lubi zjeść!
- ze dwa, trzi srogie pelkartofle (ugotowane " w mundurkach" jak godajom w Polsce), pokrajane w talarki
- koncek pokrajanego na małe wyrfliki boczku
- tak samo pokrajano dużo cybula
- ze dwa - trzi krupnioki (czy wiela ich tam zjysz)
- łyżka szmalcu abo innego tustego
Weź patelnio i rozgrzyj na nij tuste.
Wciepej cybulka i podsmażyj, aże sie zrobi lekko brunotno.
Dodej wyciśniynty ze szczewa krupniok i gryfnie wszistko usmaż.
Na drugiyj patelni usmaż pokrajany boczek, a kiej bydzie już gryfnie skwiyrczoł - dodej pokrajane pelkartofle.
Smaż, aże sie trocha zeskwiyrczom.
Podowej wszistko razym.
Maja starka dowała do tego kwaśne mlyko, ale jo myśla, że z halbką piwa bydzie lepsze!
Brak komentarzy:
Prześlij komentarz