Nie wszyscy ludeckowie wiycie, co to jest panchkraut, tak wom prawia: panchkraut, po innymu ciapkapusta, to jest taki szałot z kiszonyj kapusty, sztamfowanych kartofli i omasty ze szpeku. To sie jy najlepiyj z karminadlem abo z krupniokiem. Takim łobiadym po szychcie, to żodyn hajer niy pogardzi.
Taki panchkraut to u mojyj Starki boł roz na tydzień.
Co by zrobić panchkraut potrzybujesz:
- pół kila dobrze ukiszonyj kapusty
- pół kila gryfnych kartofli
- dwie łyżki szmalcu (no, jak ktoś bogaty z doma, to może być i masło)
- ćwierć kila uwyndzonego szpeku (może być i wurszt, ale tyż musi być dobrze uwyndzony
- ze dwa liście bobkowe
- srogo cebula
- ze trzi kulki ziela
- pora kulków pieprzu
- poł szolki mlyka
Weź kapusta, wciep jom do gorka, dodej trocha wody, liście bobkowe i wszystkie kulki.
Ugotuj jom, co by była mieciuśko.
Kartofle łostrugej, i ugotuj, co by sie rozleciały.
Weź patelnia, wciep na nia pokrajano cebula, a jak zacznie skwierczeć wciep pokrajany szpek abo wurszt. Usmaż, co by w całym domu woniało.
Kartofle musisz terozki z mlykiem i z tustym gryfnie usztamfować. Co by były głodkie jak szlagzana!
Wciepej usztamfowane kartofle do łodcedzonyj kapusty, dociep do tego szpyrka z cebulom i z grajfkom wymiyszej. Jak ci mało, to dodej pieprzu, bo mo być srogi tyn panchkraut.
Na patelnia dej trocha tustego, wciepej krupnioki i smaż pomału, żeby nie pynkły. Kiej bydom już fest wysmażone, nałóż na talyrz panchkrautu, dodej krupnioka i jydz, aż ci sie uszi zatrzynsom.
Kiej twoje roztomiłe ślubne kochanie uwidzi tako porcja, to halby piwa ci niy pożałuje!
Sczęść Boże!
Brak komentarzy:
Prześlij komentarz